Son yenilənmə tarixi: 01.06.2026

Bu sənəd Az-Hosting.org tərəfindən təqdim olunan hostinq, reseller hostinq, VPS/VDS, dedicated server, domen qeydiyyatı, korporativ elektron poçt və digər internet xidmətlərindən istifadə qaydalarını müəyyən edən ictimai oferta müqaviləsidir.

Saytda qeydiyyatdan keçən, şəxsi kabinet yaradan, sifariş yerləşdirən və ya ödəniş edən hər bir fiziki və ya hüquqi şəxs bu şərtləri tam oxumuş, başa düşmüş və qəbul etmiş sayılır.

Bu şərtlərlə razı deyilsinizsə, qeydiyyatdan keçməyin, sifariş yerləşdirməyin və xidmətlərdən istifadə etməyin.

1. Tərəflər

İcraçı: Az-Hosting.org administrasiyası, fərdi sahibkar Rəhimli Mürvət Asif oğlu, VÖEN: 6801526452.

Müştəri: Az-Hosting.org saytında və ya my.az-hosting.org şəxsi kabinetində qeydiyyatdan keçən, xidmət sifariş edən və ya ödəniş edən fiziki və ya hüquqi şəxs.

2. Müqavilənin predmeti

İcraçı Müştəriyə ödənişli əsaslarla hostinq, reseller hostinq, VPS/VDS, dedicated server, domen qeydiyyatı, DNS, korporativ elektron poçt və digər əlaqəli internet xidmətləri təqdim edir.

Xidmətlərin növü, qiyməti, müddəti və texniki parametrləri Müştərinin şəxsi kabinetdə yerləşdirdiyi sifarişə və ödənişə əsasən müəyyən edilir.

3. Elektron qəbul və müqavilənin qüvvəyə minməsi

Müştərinin qeydiyyat zamanı bu şərtləri elektron qaydada qəbul etməsi, sifariş yerləşdirməsi və ya ödəniş etməsi bu ictimai ofertanın tam və şərtsiz qəbul edilməsi hesab olunur.

Şəxsi kabinetdə saxlanılan sifariş, hesab-faktura, ödəniş qeydləri, IP ünvan, tarix və saat məlumatları tərəflər arasında elektron sübut kimi qəbul edilir.

4. Qeydiyyat və müştəri məlumatları

Müştəri qeydiyyat zamanı istifadəçi adı, parol, e-mail və mobil telefon nömrəsini düzgün təqdim etməlidir.

Xidmət sifarişi zamanı tələb olunan ad, soyad, ata adı, şəxsiyyət vəsiqəsi, ünvan və əlaqə məlumatlarının düzgünlüyünə görə Müştəri məsuliyyət daşıyır.

Yanlış, uydurma və ya başqasına məxsus məlumatların təqdim edilməsi xidmətin dayandırılması və hesabın bloklanması üçün əsas ola bilər.

5. Ödəniş və aktivləşmə

Bütün xidmətlər üzrə ödəniş əvvəlcədən həyata keçirilir. Ödəniş bank kartı, elektron ödəniş sistemi, bank köçürməsi və ya saytda göstərilən digər üsullarla qəbul edilə bilər.

Uğurlu ödənişdən sonra hostinq və domen xidmətləri texniki imkanlar daxilində aktivləşdirilir. VPS/VDS və dedicated server xidmətlərinin aktivləşdirilməsi konfiqurasiyadan asılı olaraq daha uzun çəkə bilər.

Kart məlumatları Az-Hosting.org serverlərində saxlanılmır. Ödəniş əməliyyatları ödəniş provayderinin təhlükəsiz sistemi üzərindən həyata keçirilir.

6. Xidmət müddəti və dayandırılma

Xidmətin müddəti Müştərinin sifariş etdiyi tarifə və ödəniş dövrünə əsasən müəyyən edilir.

Ödəniş müddəti bitdikdə xidmət avtomatik dayandırıla, bloklana və ya silinə bilər. Müştəri xidmət müddətini vaxtında uzatmağa görə özü məsuliyyət daşıyır.

Domenlərin vaxtında uzadılmaması nəticəsində domenin itirilməsi, bloklanması və ya üçüncü şəxslər tərəfindən qeydiyyata alınması riskinə görə Müştəri məsuliyyət daşıyır.

7. Geri ödəmə şərtləri

Xidmətin fəaliyyətində yaranan problemin səbəbi birbaşa Az-Hosting.org tərəfindən göstərilən xidmətlə bağlı olarsa, Müştəri xidmət alındığı tarixdən 24 saat ərzində müraciət edə bilər.

Domen qeydiyyatı, SSL sertifikatı, lisenziya, üçüncü tərəf xidmətləri, xüsusi konfiqurasiya edilmiş VPS/VDS və dedicated server xidmətləri üçün geri ödəniş tətbiq olunmaya bilər.

Balansa əlavə edilmiş məbləğlər əsasən sayt daxilində xidmətlərin alınması və uzadılması üçün istifadə olunur.

8. Backup və məlumatların qorunması

İcraçı texniki imkanlar daxilində ehtiyat nüsxələrin yaradılmasını təmin edə bilər. Lakin Müştəri öz sayt fayllarının, verilənlər bazalarının və e-mail məlumatlarının ayrıca ehtiyat nüsxəsini saxlamağa borcludur.

Texniki nasazlıq, üçüncü tərəf müdaxiləsi, zərərli proqram, yanlış silinmə və ya Müştərinin öz hərəkətləri nəticəsində məlumat itkisinə görə İcraçı tam məsuliyyət daşımır.

9. Məqbul istifadə siyasəti

Az-Hosting.org xidmətlərindən yalnız qanuni və etibarlı məqsədlər üçün istifadə edilə bilər.

Aşağıdakı fəaliyyətlər qadağandır:

• Phishing, fırıldaqçılıq və saxta saytların yerləşdirilməsi;
• Spam, mail bomber və kütləvi icazəsiz e-mail göndərişi;
• Virus, zərərli proqram, botnet və exploit yayılması;
• Pirat proqram, warez, crack, torrent və müəllif hüquqlarını pozan materiallar;
• Qumar, qanunsuz mərc, narkotik, silah, terror və insan alveri ilə bağlı məzmun;
• Pornoqrafik, uşaq istismarı ilə bağlı və ya qanunla qadağan olunmuş materiallar;
• DDoS, brute-force, port scan və digər kiberhücum fəaliyyətləri;
• Server resurslarından digər müştərilərə zərər verəcək formada istifadə;
• Proxy, VPN, IRC daemon, tunneling, crypto mining və yüksək riskli servis yerləşdirmək;
• Azərbaycan Respublikasının qanunvericiliyinə və beynəlxalq hüquq normalarına zidd hər hansı fəaliyyət.

Bu qaydaların pozulması halında İcraçı xəbərdarlıq etmədən xidməti dayandırmaq, hesabı bloklamaq, zərərli məzmunu silmək və aidiyyəti qurumlara məlumat vermək hüququna malikdir.

10. Mail xidmətləri

Mail xidmətlərindən spam, phishing, saxta göndəriş, icazəsiz reklam və qanunsuz məlumat yayımı üçün istifadə etmək qadağandır.

Müştəri e-mail hesablarının şifrələrini təhlükəsiz saxlamağa və güclü parollardan istifadə etməyə borcludur. Sadə parol və ya yoluxmuş cihaz səbəbindən baş verən spam göndərişlərinə görə Müştəri məsuliyyət daşıyır.

11. Domen qaydaları

Domen qeydiyyatı zamanı Müştərinin təqdim etdiyi məlumatlar registrator və müvafiq domen inzibatçısının qaydalarına uyğun olmalıdır.

.AZ və digər domen zonaları üzrə qeydiyyat, uzadılma, transfer, NS dəyişiklikləri və mübahisələr müvafiq domen inzibatçısının qaydalarına əsasən həyata keçirilir.

12. Müştərinin məsuliyyəti

Müştəri xidmətlərdən istifadə zamanı yerləşdirdiyi bütün sayt, fayl, e-mail, domen, proqram təminatı və digər məzmunun qanuniliyinə görə tam məsuliyyət daşıyır.

Müştərinin fəaliyyəti nəticəsində üçüncü şəxslər və ya dövlət orqanları tərəfindən İcraçıya qarşı iddia irəli sürülərsə, yaranan zərər, cərimə və xərclər Müştəri tərəfindən ödənilməlidir.

13. İcraçının məsuliyyətinin məhdudlaşdırılması

İcraçı internet provayderləri, data mərkəzləri, registratorlar, ödəniş sistemləri, elektrik, şəbəkə, proqram təminatı və üçüncü tərəflərdən qaynaqlanan problemlərə görə məsuliyyət daşımır.

Planlı texniki işlər, təhlükəsizlik tədbirləri və fövqəladə hallar zamanı xidmətlər müvəqqəti dayandırıla bilər.

14. Dövlət orqanları ilə əməkdaşlıq

Qanunvericiliyə uyğun rəsmi sorğu daxil olduqda İcraçı Müştəri və xidmətlərlə bağlı tələb olunan məlumatları aidiyyəti dövlət orqanlarına təqdim edə bilər.

15. Müqaviləyə dəyişiklik

Az-Hosting.org bu şərtlərə dəyişiklik etmək hüququnu özündə saxlayır. Yenilənmiş versiya saytda dərc edildiyi andan qüvvəyə minir.

16. Əlaqə

Az-Hosting.org

Fərdi sahibkar: Rəhimli Mürvət Asif oğlu
VÖEN: 6801526452
E-mail: info@az-hosting.org
Telefon: +994 70 579 47 37